छत्तीसगढ़ म ठेकेदार ह केबल ल काट के ठप कर दीस जियो 4जी के सर्विस

रायपुर। मुकेश अंबानी के जियो 4जी सर्विस ले देशभर म छा जाए के सपना ल छत्तीसगढ़ म इही कंपनी के एक वेंडर ह कई घंटा बर चिभोर दीस। वो ह जियो 4जी के केबल ल कई जघा काट दीस, एकर ले कई घंटा तक राजधानी रायपुर म जियो जी सर्विस ठप्‍प रहिस। कोतवाली पुलिस ह ये मामला म ठेकेदार सोहैल कुरैशी ल गिरफ्तार करे हे। ठेकेदार उपर टेलीफोन कानून के तहत मामला दर्ज करे गए हे। बताथें के जियो कंपनी कोति ले महाप्रबंधक अमन सिंह ह ठेकेदार के खिलाफ मामला दर्ज कराये रहिस हे। आरोपी हर राजेंद्र नगर अउ टैगोर नगर म जियो के केबल ल कटवा देहे रहिस तेखर सेती 15 घंटा तक जिओ के सर्विस बंद रहिस। सोहैल ल पांच महीना पहिली ठेका देहे गए रहिस हे। नवंबर म कंपनी के अधिकारी मन संग ओखर मीटिंग भोपाल म होईस जिहां ओला काम के बारे म बताये गए रहिस।




इहां ओकर काम म कमी-बेसी उपर अधिकारी मन आपत्ति जताईन अउ ओला काम रोके बर बोलिन अउ पेमेंट ले लेहे ल बोलिन। बताथें के कंपनी ले पैइसा ल लेकेे ठेकेदार के विवाद चलत जउन सुलझत नइ रहिस जेकर खातिर सौहैल ह केबल ल नुकसान पहुंचाइस। कम्‍पनी ह लउहे बिरसपत बिहनिया तक सर्विस ल दूबारा चालू कर दे रहिस हे।